സൂറത്തു ശറഹ് : ഹൃദയത്തിനേകുന്ന ഇലാഹീ പ്രകാശം



ഇലാഹീ പ്രകാശം കൊണ്ട് ഹൃദയത്തെ വിശാലമാക്കുന്ന, മനസ്സിന് സമാധാനം നൽകുന്ന, പരിശുദ്ധ ഖുർആനിലെ 94 മത്തെ സൂറത്താണ് സൂറത്തു ശറഹ്. വെറും എട്ട് സൂക്തങ്ങൾ മാത്രമാണെങ്കിലും ഏതു ഹൃദയത്തിനും ആശ്വാസം  നൽകാൻ കഴിവുള്ളതാണീ വചനങ്ങൾ.

 سورة ألم نشرح ،سورة الانشراح

 എന്നൊക്കെ ഈ സൂറത്തിന് നാമങ്ങളുണ്ട്.വിഷയവും, സന്ദർഭ പശ്ചാത്തലവും, പ്രമേയവും, സൂറയുടെ സ്ഥാനവുമനുസരിച്ച്, സൂറത്തു ളുഹയെ തുടർന്നാണ് ഈ സൂറത്ത് അവതരിച്ചത്. രണ്ട് സൂറത്തിലും, മുഹമ്മദ് നബി (ﷺ) ക്ക് തന്റെ പ്രവാചകത്വത്തിലും ഇസ്‌ലാമിന്റെ വ്യാപനത്തിലും ഉറപ്പ് നൽകാനും, തിരുമേനിയെ ആശ്വസിപ്പിക്കാനും വേണ്ടി അല്ലാഹു നൽകിയ അനുഗ്രഹങ്ങൾ എടുത്തുപറയുന്നുണ്ട്.


       പ്രവാചകത്വത്തിന് മുമ്പ്  നബി(സ)യെ ബഹുമാനിക്കുകയും ആദരിക്കുകയും ചെയ്തിരുന്ന മക്കയിലെ ജനങ്ങൾ ശത്രുക്കളായി മാറുകയും , അവരെ ഏകദൈവ വിശ്വാസത്തിലേക്ക് ക്ഷണിച്ചപ്പോൾ തിരുനബിയെ കൊല്ലാൻ ശ്രമിക്കുകയും ചെയ്ത, പ്രവാചകത്വത്തിന് ശേഷമുള്ള, മക്കയിലെ 13 വർഷകാലം നബിതിരുമേനിക്ക് വളരെ വേദനകൾ സഹിക്കേണ്ടി വന്ന കാലമായിരുന്നു.  ബന്ധുക്കൾ നബിയോട് മുഖം തിരിച്ചു. പിതൃവ്യൻ അബു താലിബും ഭാര്യ ഖദീജ ബീവി (റ) യും തിരുസ്വഹാബത്തും മാത്രമാണ് നബിക്ക് പിന്തുണ നൽകിയത്.പിതൃവ്യന്റെയും ഭാര്യയുടെയും മരണശേഷം,നബി(സ) വളരെ സങ്കടത്തിലായി. ഈ കഠിനമായ ബുദ്ധിമുട്ടിൽ നിന്നും തിരുമേനിക്ക് ആശ്വാസം നൽകിക്കൊണ്ട്,

തന്റെ അനുഗ്രഹങ്ങളെ ക്കുറിച്ചുള്ള സന്തോഷവാർത്ത പരാമർശിച്ചുകൊണ്ട്, അല്ലാഹു  സൂറത്തു ളുഹയും സൂറത്ത് ശറഹും അവതരിപ്പിച്ചു.


സൂറത്തുൽ ഇൻഷിറാഹിലെ 5,6 വാക്യങ്ങളിൽ അല്ലാഹു  പരാമർശിക്കുന്നു:

فَإِنَّ مَعَ الْعُسْرِ يُسْرًا. إِنَّ مَعَ الْعُسْرِ يُسْرًا

 "അതിനാൽ തീർച്ചയായും, എല്ലാ ബുദ്ധിമുട്ടുകൾക്കും ഒരു ആശ്വാസമുണ്ട്."

ഈ വാക്യം പ്രത്യാശയുടെയും പ്രോത്സാഹനത്തിന്റെയും സന്ദേശമാണ്.വ്യക്തമായും, എല്ലാ പ്രയാസങ്ങൾക്കും  വേദനകൾക്കും  എളുപ്പവും ആശ്വാസവും ഉള്ളതാണെന്ന് പ്രഖ്യാപിച്ചുകൊണ്ട് അല്ലാഹു  തന്റെ പ്രവാചകൻ മുഹമ്മദ് (ﷺ) യെ ആശ്വസിപ്പിച്ചു.


അവസാന വാക്യങ്ങളിൽ,  എല്ലാ പ്രശ്‌നങ്ങൾക്കും പരിഹാരം നൽകി അല്ലാഹുവിലേക്ക് തിരിയാനും, കഷ്ടതകളിലും കഷ്ടപ്പാടുകളിലും അവനെ ഓർക്കാനും , സൽകർമ്മങ്ങളാൽ അവനെ സന്തോഷിപ്പിക്കാനും അല്ലാഹു പ്രവാചകൻ മുഹമ്മദ് (സ) യോട് പറയുന്നു.

        

          സൂറത്ത് ഷറഹ് നിരവധി  ആത്മീയ രോഗശാന്തികളുടെ പ്രാഥമിക ഉറവിടമാണ്. 

തിരുനബി(സ) പറഞ്ഞു: "സൂറത്തുൽ-ഇൻഷിറ പാരായണം ചെയ്യുന്നയാൾ മുഹമ്മദ് നബി (സ)യെ കണ്ടുമുട്ടിയവനെപ്പോലെയാണ്, ദുഃഖത്തിലാണെങ്കിൽ അല്ലാഹു അവന്റെ ദുഃഖങ്ങൾ നീക്കും."

ഇമാം സാദിഖ് (റ) പറഞ്ഞു: "രാവും പകലും സൂറത്ത് അൽ-ഇൻഷിറാഹ് ആവർത്തിച്ച് പാരായണം ചെയ്യുന്നവന്റെ ശരീരഭാഗങ്ങളെല്ലാം ന്യായവിധി നാളിൽ അവന് അനുകൂലമായി സാക്ഷ്യം വഹിക്കും."

 "ഫജ്ർ നമസ്കാരത്തിൽ സൂറത്ത് ഷറഹും സൂറത്ത് ഫീലും ഓതുന്നവൻ ഒരിക്കലും അന്ധനാകുകയില്ല"എന്ന പ്രവാചക വചനം ഇതിൻ്റെ മാഹാത്മ്യം വിളിച്ചോതുന്നതാണ്.

സൂറത്തു ഇൻഷിറാഹ് പാരായണം ചെയ്യുന്നവർക്ക് അല്ലാഹു ഭാഗ്യവും മതത്തിലുള്ള വിശ്വാസവും നൽകുമെന്ന് അല്ലാഹുവിന്റെ പ്രവാചകൻ (സ) അരുളിയിട്ടുണ്ട് .


                  സൂറ അൽ-ഇൻഷിറാഹിന്റെ  ഈ ആത്മീയ നേട്ടങ്ങൾക്കും ഗുണങ്ങൾക്കും പുറമേ , പാരായണം ചെയ്യുന്നതിലൂടെ വിവിധ ശാരീരിക നേട്ടങ്ങളുമുണ്ട്.ഈ സൂറത്ത് പാരായണം ചെയ്യുന്നത്

ഹൃദയവും നെഞ്ചുവേദനയും ഒഴിവാക്കുന്നു,ആരോഗ്യവും ഉറപ്പും നൽകുന്നു,കടലിൽ യാത്ര ചെയ്യുമ്പോൾ സംരക്ഷണം,എളുപ്പമുള്ള പ്രസവത്തിന് സഹായിക്കുന്നു.സൂറത്തുൽ -ഇൻഷിറാഹിന്റെ പാരായണം സമ്പത്ത് വർദ്ധിപ്പിക്കുന്നതിന് സഹായിക്കുന്നു.ഇതുകൂടാതെ, ഈ സൂറത്ത് പാരായണം ചെയ്യുന്നതിന്റെ ഏറ്റവും പ്രധാനപ്പെട്ട നേട്ടങ്ങളിലൊന്നാണ് ഓർമ്മശക്തിയും ഏകാഗ്രതയും വർദ്ധിക്കുന്നത്.കൂടാതെ, സൂറത്തു ശറഹ് പാരായണം വൃക്ക രോഗത്തിനുള്ള ആത്മീയ ചികിത്സയാണ്. ഈ സൂറത്ത് ഓതിയ വെള്ളം കുടിക്കുന്നത് വൃക്കയിലെ കല്ലുകളും മൂത്ര തടസ്സവും ഇല്ലാതാക്കുന്നു.


             കഷ്ടതകളും പ്രയാസങ്ങളും നിറഞ്ഞ ലോകത്ത്, വിശ്വാസിക്ക് ഈ സൂറത്ത് നൽകുന്ന ആത്മശാന്തി ചെറുതൊന്നുമല്ല.കാരണം, അല്ലാഹു വാഗ്ദാനം ചെയ്തതുപോലെ അത് അവരുടെ ബുദ്ധിമുട്ടുകളും ദുരിതങ്ങളും ലഘൂകരിക്കും. ഓരോ മുസ്ലീമിനും അതിന്റെ പാരായണം പ്രധാനമാണ്, കാരണം അത് നരകാഗ്നിയിൽ നിന്ന് നമ്മെ രക്ഷിക്കും. നാഥൻ തുണക്കട്ടെ - ആമീൻ.


Mufeeda. NK

Wmo womens college wayanad